उपत्यकामा कोरोना संक्रमण बढ्ने क्रम जारी , शुक्रबार ४२ थप संक्रमण पुष्टि

काठमाडौं / पछिल्लो २४ घण्टामा काठमाडों उपत्यकामा ४२ जनामा संक्रमित पुष्टि भएको छ । तीमध्ये काठमाडौंमा २८ जना, ललितपुरमा १३ र भक्तपुरमा १ जना संक्रमित थपिएका हुन् ।
आज शुक्रबार देशका विभिन्न प्रयोगशालामा गरिएको ४८०६ जनाको पिसीआर परीक्षण गरिएकोमा ११८ जना संक्रमित भएको देखिएको छ । स्वास्थ्य तथा जनसंख्या मन्त्रालयले कोरोना अपडेटबारे नियमित प्रेस ब्रिफिङमा यस्तो जानकारी दिएको हो । योसँगै नेपालमा कोरोना संक्रमितको संख्या १६,६४९ पुगेको छ ।
यसरी उपत्यकामा संक्रमण टोल टोलमा फैलिनेक्रम बढिरहेको बेला सरकारले छोटो दुरीको भाडाको सवारी चलाउने घोषणा गरेर घर घरमा कोरोना निम्त्याएको हो कि भनी उपत्यकाबासी क्रुद्ध बनेका छन् । उपत्यकामा संक्रमण नै नभएको बेला कडा लकडाउन गर्ने तर यतिबेला समुदायमा समेत कोरोना फैलिएर महामारी फैलिन सक्ने संभावना बढेको बेला यसरी सार्वजनिक सवारीसम्म चलाउन दिने सरकारको निर्णयप्रति सबै क्षेत्रका जनता सशंकित बनेका छन् ।

स्वास्थ्य तथा जनसंख्या मन्त्रालयले जनाए अनुसार सोमबार देशभर २३ हजार ९१० जना क्वारेन्टाइनमा रहेका छन् । त्यस्तै कुल ८ हजार ६०३ जना आइसोलेसनमा उपचाररत रहेका छन् ।
त्यसैगरी १ सय २० जना डिस्चार्ज भएका छन् । योसँगै नेपालमा डिस्चार्ज हुनेको संख्या ८ हजार ११ जना पुगेको छ । नेपालका ७७ जिल्लामा कोरोना भाइरसको संक्रमण फैलिएको छ भने केही जिल्ला कोरोनामुक्त भएको पनि बताइएको छ ।