अन्तत: सरकारी गाडी चढेर काठमाडौं आएको परिवारलाई उतै फर्काइयो

अन्तत:  सर्लाहीबाट सरकारी गाडी चढेर काठमाडौं आइपुगेको एक परिवारलाई सर्लाहीमै फर्काइएको छ ।
लकडाउनको अबस्थामा सर्लाहीको होरैता नगरपालिका २ का एक महिला आफ्ना एक छोरा र एक छोरीका साथ कोरोना संक्रमणबाट सुरक्षित भन्दै काठमाडौं आइपुगेका थिए । वटुमा बसेका उनलाई स्थानीयको बिरोधपछि आज ती तीनजना सहित महिलाका श्रीमानलाई पनि सर्लाहीमै फर्काइएको छ ।
काठमाडौं महानगरपालिका वडा २२ का वडाध्यक्ष चिनीकाजी महर्जनले आवश्यक पास उपलब्ध गराइ दुई वटा मोटरसाइकलबाट उनीहरुकैे घर मलङ्गवामै फर्काइएको जानकारी दिएका छन् ।
उनीहरू हिजो प्रदेश २ अन्तर्गत सामाजिक विकास मन्त्रालयको बा २ झ २४१३ नम्बरको गाडीबाट उनीहरु काठमाडौं आएका थिए ।
काठमाडौं आएपछि शुरुमा उनीहरु काठमाडौं महानगर पालिका वडा नं २३स्थित वडा ओमबहालमा नातेदारको डेरामा बस्न गएका थिए । तर स्थानीयले विरोध गरेपछि उनीहरु त्यहाँबाट फेरी २२ वडा वटु टोलमा बस्न गएका थिए ।
वटु टोलमा पनि स्थानीयले लकडाउनको समयमा सरकारी गाडीले तराईबाट मान्छे ओसारेको भन्दै विरोधमा उत्रिएपछि अन्ततः उनीहरू आएकै बाटो फर्कन बाध्य भए ।
स्थानीय निकायहरूको संघले समेत सरकारलाई उपत्यकामा बाहिरबाट प्रवेश गर्ने सबै नाकामा कडाइ गरि ओहोरदोहोरमा रोक लगाउन सरकार समक्ष माग राखेकै बेला यसप्रकारको उलंघन सरकारी गाडी नैं प्रयोग गरि गरेपछि उपत्यकाबासी क्रुद्ध बनेका थिए । यस घट्नालाई लिएर वडा नं २५ का वडा अध्यक्ष नीलकाजी शाक्यले छानबिन गर्न समेत माग गरेका थिए ।