लकडाउनलाई बेवास्ता गर्दै काठमाडौमा हरेक दिन २ हजार मानिस भित्रिंंदै

काठमाडौं /लकडाउनको समयमा अत्यावश्यक काममा बाहेक घरबाहिर निस्कन प्रतिबन्ध छ । संक्रमण फैलिन नदिन लागू गरिएको लकडाउन उल्लंघन गर्ने क्रम बढेपछि सरकारले नै एउटा जिल्लाबाट अर्को जिल्ला र एउटा स्थानीय तहमा अर्को स्थानीय तहमा जान नदिने निर्णय गरेको छ । यसका बाबजुद ओहोरदोहोर रोकिएको छैन । बरु अलपत्र परेको नाममा काठमाडौंबाट वाहिर र वाहिरबाट काठमाडौंमा यात्रु ओसार्ने होडबाजी चलेको छ । संक्रमणको जोखिम बेवास्ता गरी यात्रु ओसार्ने काममा जनप्रतिनिधि नै संलग्न छन् । सवारीसाधनमार्फत दैनिक करिब २ हजार यात्रु काठमाडौं भित्रिरहेको र काठमाडौंबाट पनि त्यति नै संख्यामा बाहिरिइरहेको ट्राफिक प्रहरीको तथ्यांक छ । लकडाउनका बेला अत्यावश्यक सेवा बाहेकका सवारी चलाउन स्थानीय प्रशासनको अनुमति चाहिन्छ । तर प्रशासन र स्थानीय तहले जथाभावीरुपमा पास बाँडेका छन् । काठमाडौंमा अत्यावश्यक सेवाका सहित दैनिक ९ सय हाराहारीमा सवारीसाधन भित्रिरहेका छन् । अत्यावश्यक सेवाका सवारी साधनले यात्रु पनि ओसारिरहेका छन् । यसले संक्रमणको जोखिम त बढाएको छ नै, लकडाउनको औचित्यमाथि पनि प्रश्न उठाउन थालिएको छ । त्यही कारण काठमाडौं महानगरपालिकाले रोजगारी गुमाएर र अन्य कारण खान नपाउने स्थितिमा पुगेकाहरुको जिम्मा स्थानीय तहले लिने तर यात्रु ओसार्ने काम पूर्ण रुपमा बन्द गर्नुपर्ने बताएको छ । लकडाउन गरिनुको मुख्य कारण संक्रमणको जोखिम हो । त्यसैले जनप्रतिनिधिले अलपत्र परेका यात्रुलाई घर पठाउन होडबाजी गर्ने भन्दा उनीहरुलाई खान बस्न सहयोग गरेर संक्रमण रोकथाममा पहलकदमी लिनुपर्ने देखिन्छ । यो होडबाजी कायम रहे काठमाडाैँजस्ता जनघनत्व धेरै रहेका सहरमा महामारीले जुनसुकै बेला उग्र रूप लिन सक्ने जोखिम छ ।
साभार: कान्तिपुर