फोटो पत्रकारिता दिवसमा फोटो पत्रकारहरुको कोभिड १९ बिमा

काठमाडौं/फोटो पत्रकार क्लब (पिजे)ले कोरोना भाइरस (कोरोना-१९)लाई मध्‍य नजर गर्दै सबै सदस्यहरुको बीमा गरेको छ।
९३औ राष्ट्रिय फोटो पत्रकारिता दिवसको अवसरमा क्लबले विज्ञप्ति जारी गर्दै पत्रकार तथा उनीहरुको श्रीमान्-श्रीमतीको समेत ५० हजार बराबरको कोभिड बीमा गरेको छ जनाएको छ।
विज्ञप्तिमा भनिएको छ, ‘अहिले नेपाल लगायत पूरा विश्‍व नै कोभिड-१९ बाट उत्पन्‍न जटिल परिस्थितिसँग लडिरहेको छ।यसको यस्तो विषम परिस्थितिमा पनि नेपाली जनतालाई सुचनाको हकबाट बञ्चित नगरिकन नेपाली सञ्चार गृह, पत्रकार र फोटो पत्रकारहरुले समाज, राष्ट्र र आम मानवजातिप्रतिको जिम्मेवारी खरो रुपमा वहन गरिरहेका छन्। राष्ट्रिय फोटोपत्रकारिता दिवसको अबसर फोटो पत्रकारहरुको सुरक्षा तथा मनोबल उच्च राख्नका लागी हामीले शिखर इन्स्योरेन्ससँगको सहकार्यमा क्लबका सबै सदस्य र सदस्यको (श्रीमान-श्रीमती)लाई ५० हजार रुपैयाँको कोभिड १९ बीमा गरिने घोषणा गर्दछौ।यसबीचमा योजनाले फोटो पत्रकारहरुको सुरक्षित तवरले फिल्डमा खटिइ आफ्नो जिम्मेवारी बहन गर्ने मनोबलमा वृद्धि गर्ने क्लबले विश्वास लिएको छ।’
यसका साथै क्लबले दिवसको अवसरमा पेशागत जिम्मेवारीमा खरो उत्रिइरहेका फोटो पत्रकारलाई अझ बढी ढुक्क भएर निर्भयताका साथ काममा लाग्न शुभकामना दिएको छ।