नेपालमा कोरोना संक्रमण तेस्रो चरणमा प्रवेश – उदयपुरको भुल्के गाउँ नैं संक्रमणको जोखिममा, सेनाले थप २५१ को स्वाब परिक्षणको नमूना काठमाडौं पठायो

काठमाडौं / उदयपुरमा देखिएको कोरोना भाइरस (कोभिड–१९)
को संक्रमणको आधारमा भन्ने हो भने नेपालमा कोरोना भाइरस संक्रमण तेस्रो चरणमा पुगेको छ । अर्थात् समुदायमा यो रोगको संक्रमण भएको छ । उदयपुरको त्रियुगा नगरपालिका -३ स्थित भुल्के भन्ने ठाउँमा रहेको मस्जिदमा समुहमा बसेका १२ जनामा कोरोना पोजिटिभ आएको थियो भने अहिले उनीहरूको सम्पर्कमा आएका मस्जिद वरपर बसोबास गर्ने ११ जनामा पनि कोरोना भाइरसको संक्रमण रहेको पुष्टि भ इसकेको छ । यसलाई कोरोना समुदायमा सरेको अर्थात् “कम्युनिटी ट्रान्समिसन” भएको भनिन्छ । यसैलाई कोरोना संक्रमणको तेस्रो चरणको रुपमा लिइन्छ ।
उदयपुरको त्रियुगा नगरपालिका–३, भुल्केस्थित मस्जिद आसपासका थप आठ जनामा कोरोना भाइरस सङ्क्रमण भएको प्रारम्भिक नतिजा आएपछि उनीहरूलाई थप परीक्षण र उपचारका लागि बीपी कोइराला स्वास्थ्य विज्ञान प्रतिष्ठान धरान लगिएको थियो । मस्जिदमा बसेका १३ जनामा कोरोना सङ्क्रमण पाइएपछि उनीहरूसँग नियमित सम्पर्कमा रहेका मुस्लिम समुदायका ५३ घरका बासिन्दाको स्वाब सङ्कलन गरिएको थियो । प्रदेश १ स्थित विराटनगर प्रयोगशालाका निर्देशक नेतृत्वको प्राविधिक टोली भुल्के आएर यही शनिबार स्वाबको नमुना सङ्कलन गरेको थियो ।
पहिलो चरणमा परिवारका मुख्य व्यक्ति र सङ्क्रमितसँग प्रत्यक्ष सम्पर्कमा रहेका ६९ जना स्थानीयवासीको नमुना सङ्कलन गरी विराटनगरस्थित प्रादेशिक अस्पतालको ल्याबमा पीसीआर परीक्षण गरिएकोमा एकै परिवारका चारसहित आठजना पुरुषको नतिजा पोजेटिभ पाइएपछि थप परीक्षण तथा उपचार व्यवस्था गर्न धरान लगिएको हो । जनस्वास्थ्य कार्यालय उदयपुरका प्रमुख मोहनप्रसाद सुवेदीका अनुसार नमुना लिइएका अन्य ६१ जनाको नजिता भने आउन बाकी रहेको छ । अहिले भुल्के गाउँ नै कोरोनाको उच्च जोखिममा रहेको र लकडाउन कडाइ गरेर परिक्षणमा जोड दिनुपर्ने विशेषज्ञहरुको धारणा रहेको छ ।
यसैबीच नेपाली सेनाको चिकित्सक टोलीले सङ्क्रमितसँगको सम्पर्कमा रहेका थप २५१ जना स्थानीयवासीको कोरोना परीक्षणका लागि स्वाबको नमुना सङ्कलन गरेको छ । कोरोना भाइरस सङ्क्रमणको त्रासले स्थानीयवासी भयभीत भइरहेको अवस्थामा काठमाडौँको छाउनीस्थित नेपाली सेनाको अस्पतालबाट सेनानी डा. प्राची रायमाझीको नेतृत्वमा आएको चिकित्सकहरूको टोलीले दुई दिन लगाएर उक्त स्वाब सङ्कलन गरेको हो ।
सङ्कलित नमुना पीसीआर परीक्षणका लागि सोमबार नै काठमाडौँ पठाइएको नेपाली सेनाको १८ नं. वाहिनीका वाहिनीपति सहायक रथी कृष्णप्रसाद सापकोटाले जानकारी दिए । स्थानीय प्रशासनद्वारा कडा सुरक्षा घेराभित्र सिलबन्दी गरिएको भुल्के गाउँका बासिन्दालाई खाद्यान्न, तरकारी, औषधि र दूध नगरपालिकाले उपलब्ध गराउने गरी प्रभावकारी रूपमा राहत वितरण गरिन थालिएको त्रियुगा नगरपालिकाका प्रमुख बलदेव चौधरीले बताए ।
भुल्के गाउँमा क्षेत्र शिल्ड गरिएको छ । जोखिममा रहेकोे यो संवेदनशील क्षेत्रलाई अहिलेसम्मको परिस्थिति अनुसार सरकारले गरिरहेको कार्य सर्‍हानीय छ तर अझै पर्याप्त भने छैन । सजगता सचेतता जरुरी छ ।कोरोनाबाट वचन भनी एक गाउँबाट अर्को गाउँतिर लुकीलुकि हिंड्ने र तर थाहा नै नपाई सँगै कोरोना पनि लिएर जान सक्ने त्रास पनि रहेको छ ।
कोरोना संक्रमणको तेस्रो चरणमा प्रवेश गरिसकेको यो संवेदनशील अवस्थामा अबका दिनहरूमा सरकारले अन्यत्र संक्रमण नहुने गरि यस क्षेत्रमा संक्रमण नियन्त्रणमा लिन अत्यावश्यक रहेकोे छ ।