कोरोनाभाइरसया बारे न्हूगु जानकारी..

डा. रोशन श्रेष्ठ 

– मस्त व ल्यायम्ह पिं कोरोनाभाइरस या शिकार जूपिनि पालि मनावइगु, पालि त:कै व:गु थें कैचा कैचा खनेदैगु लक्षण खनेदत । स्पेनया डाक्टर पिनिगु धापू कथं थ्व लक्षण बाज्य: वंपिं व ज्याथ:पिनि पाली खनेमदु । मस्त व ल्यायम्हपिन्त कोरोनां पुन धैगु थ्व लक्षण स्वया सिइके फइ  कि फइमखु अध्ययन जुयाच्वंगु दु ।
– कोरोनाया वास:कथं रेम्डिसिभिर परिक्षणया लिच्व: कथं ७५% बिरामीपिन्त वासलं थ्यूगु व लनावंगु लिच्व: व:गु दु । रेम्डिसिभिर वासलं उपचार या:पिं ५०% यात अस्पतालं डिस्चार्ज यायेधुंकल । तर २५% वासलं मथ्यूपिन्त छु याना वास: यानाच्वन धैगु जानकारी पित ब्यूगु मदु ।
– चीनया थी थी शहर हाकनं लकडाउन याना ह:गु दु । हार्बिन शहरय् लकडाउन या:गु धा:सा कोरोनाभाइरसया कारणं मखु । बरु फय् तस्कं प्रदुषित जुया ख: । कोरोनाभाइरस लकडाउनया इलय् फय तस्कं सफा जुइधुंकुगु थासय् लकडाउन चिइकेवं छक्वलं कारखाना, किसान, मटरगाडी सकलें सक्रिय जूबलय् फय् प्रदुषित जुया पिएम२.५ या ल्या २५०० हाराहारी थ्यन । पिएम२.५ धैगु २०० सिबे अप्व: जुल कि तस्कं हानिकारक । थथे तस्कं तस्कं हाइ भ्यालु जुल कि मनूया स्वँ फेल जुइ य:। शायद अय् जुया हाकनं लकडाउन यायेमा:गु जुइफु । स्वनिगलय् नं आ: लकडाउन लिकायेसाथ छक्वलं फय् प्रदुषण तस्कं अप्वया वनीगु खतरा दु । असार निगूगु हप्ता लिपा धा:सा मनसुन दुहाँ वया वा वइगु जुया फय् या प्रदुषण नियन्त्रित जुया वनी ।
– कोरोनाभाइरसया कारणं नेपा: लगायत हलिं न्यंक हे अतिवृष्टी व अनावृष्टी जुइगु सम्भावना तच्वयावंगु आँकलन विश्लेषण जुयाच्वंगु दु । जोतिषिय भविष्यवाणी थें तायेका दीमते, तर आ: वइगु मनसुन, वा वइगु सिजनय् प्रकोपजन्य वर्षा तच्वया वनीगु अवस्थाया दु । हलिं न्यंक हे लकडाउन जूगुलिं फय् या एरोसोल लोड कुहाँ वना अनबालान्स जुल । लकडाउन लिकायेवं हाकनं चीनय् थें फयाँ हे फयेमफयेक एरोसोल लोड थहाँ वनीतिनि । एरोसोल धैगु ग्रीनहाउस ग्यास कार्वन-डाइअक्साइ, मिथेन, सल्फर व नाइट्रोजनया अक्साइड त सिबे नं यक्व गुना अप्व: असर याइगु तत्त्व ख:। खास याना बायूमण्डलय च्वय् च्वय् च्वंगु सतहलय् कय्‌कुनाच्वंगु ल:यात च्वापुया कणय् हिलेगु ज्याय् एरोसोलं पुसाया ज्या याइ । व हे च्वापुया कणय् हिलेधुंका: तिनि वा: वइगु प्रक्रिया न्ह्यानावनी । अय् जुया एरोसोल अन्बालान्स जुइगु धैगु तस्कं हे त:धंगु वातावरणीय परिवर्तन ख:। पृथ्वीया सतहया एरोसोल लोड हिलीबलय् च्वय् च्वय् या सतहलय् उकिंया असर गुलितक लाइ धैगु खँय् धा:सा अनिश्चितता यक्व दु ।
कोरोनाभाइरसया बारे सुचं सुचुकेत चिन सरकारं छु छु यात धैगु दस्तावेज एपि या पत्रकारतसें ल्हातय् लाकुगु दु । अमेरिकाया विशेषज्ञतसें नं चिनया सरकारी (आधिकारिक) जक मखु विशेषज्ञपिन्सं बिइगु सुचं नं विश्वास याये थाकु धैगु संकेत बियाह:गु दु । इमिसं आ: जाँचबुझ याना: छसिकथं पिथना हइ जुइ । जिं व बारे च्वया च्वने मखुत ।
खँ थुइका दिसँ वास्तविकता सिइका दिसँ ।