नेपालमा संक्रमितको संख्या ३० पुग्यो एकै दिन १४ जनामा कोरोना पुष्टि : थप ८ भारतीय संक्रमित

काठमाडौं/ लक डाउनको केही दिनसम्म दोहोरो अंक ननाघेको संक्रमितको संख्या शुक्रबार एकै दिन १४ जनामा कोरोना संक्रमण पुष्टि भएपछि नेपालमा कोरोना भाइरस (कोभिड-१९) संक्रमितको संख्या ३० पुगेको जनाइएको छ । स्वास्थ्य तथा जनसंख्या मन्त्रालयका अनुसार शुक्रबार उदयपुरमा १२ र चितवनमा दुईजना गरेर एकै दिन १४ जनामा कोरोना पुष्टि भएको छ। यसअघि १६ जनामा कोरोना देखिएको थियो।
उदयपुरको त्रियुगा नगरपालिका-३ भुल्केस्थित मस्जिदमा बसेका १०पुरुषमध्ये ८ जनाको स्वाब परीक्षण गर्दा कोरोना पोजेटिभ देखिएको हो। उदयपुरकै अन्य चारजनामा समेत कोरोना पोजेटिभ देखिएको मन्त्रालयले जनाएको छ। संक्रमितहरु २० वर्षदेखि ४० वर्षसम्म उमेरका अधिकांश भारतीय नागरिक रहेको बताइएको छ । कोरोना संक्रमित सबैलाई विराटनगरस्थित कोरोना अस्पताल लगिएको छ।
त्यसैगरी शुक्रबार चितवमा २७ वर्षीय पुरुष र ६३ वर्षीया महिला गरी दुई जनामा कोरोना देखिएको छ।
शुक्रबार दिउँसो ४ बजे नियमित पत्रकार सम्मेलनमा स्वास्थ्य मन्त्रालयका प्रवक्ता डा. विकास देवकोटाले अहिलेसम्म नेपालमा १६ जनामा मात्र कोरोना पुष्टि भएको बताएका थिए। तर साँझ मन्त्रालयले फेसबुक पेजमार्फत थप १४ जनामा कोरोना पुष्टि भएको जानकारी दिएको हो। अहिलेसम्म सुरुमा कोरोना भएका एकजना निको भएर सामान्य जीवनमा फर्किएका छन्। अन्य १५ जनाको विभिन्न अस्पतालमा उपचार भइराखेको छ।
सरकारले कोरोना भए नभएको थाहा पाउन र्‍यापिड डाइग्नोस्टिक टेष्ट (आरडीटी) र पोलिमरेज चेन रियाक्सन (पीसीआर) विधिबाट परीक्षण गरिरहेको छ।
स्वास्थ्य तथा जनसंख्या मन्त्रालयका अनुसार आरडीटी विधिबाट ७५ जिल्लामा कोरोना परीक्षण विस्तार गरिएको छ। मन्त्रालयका प्रवक्ता डा. देवकोटाले डोल्पा र सोलुखुम्बुमा भने चाँडै आरडीटी टेष्ट सुरु हुने बताए।
आरडीटी टेष्ट ७५ जिल्लामा पुग्दा सातै प्रदेशका विभिन्न ठाउँमा गरेर १४ स्थानमा पीसीआर विधिबाट स्वाब परीक्षण सुरु भएको छ। शुक्रबाट पाटन अस्पताल, लगनखेलमा पीसीआर विधिबाट स्वाब परीक्षण सुरु भएपछि यसको विस्तार १४ ठाउँमा पुगेको हो।
अहिलेसम्म आरडीटी विधिबाट १६ हजार ५ सय ६५ नमुना परीक्षण भएको छ भने पीसीआर विधिबाट सात हजार ६ सय ८८ जनाको कोरोना परीक्षण भएको छ। जसअनुसार कुल२४ हजार दुई सय ५३ नमुनाको परीक्षण भएको मन्त्रालयले जनाएको छ।