“मिस नेपाल”का कार्यक्रम पनि रोकियो !

काठमाडौं /विश्वको महामारी कोरोना भाइरसको संभावित संक्रमणलाई ध्यानमा राखेर मिस नेपाल प्रतियोगिता पनि स्थगित गरिएको छ ।
कोरोना भाइरस संक्रमण रोकथामका लागि नेपाल सरकारले उच्च सतर्कता अपनाएर फिल्म हल, सांस्कृतिक केन्द्र, म्युजियम र मनोरञ्जन स्थललगायत बन्द गरेपछि मिस नेपाल प्रतियोगिताका कार्यक्रमहरु वैशाख १८ सम्मको लागि स्थगित गर्ने निर्णय गरेको जनाइएको छ ।
बिहीबार मिस नेपालको आयोजक संस्था द हिडन ट्रेजरको एक बैठकले मिस नेपाल प्रतियोगिताका गतिविधिहरू हाललाई स्थगित गर्ने निर्णय गरेको थियो ।

‘संसारभर फैलिएको कोरोना भाइरस संक्रमण रोकथामका लागि नेपाल सरकारले उच्च सतर्कता अपनाएर फिल्म हल, सांस्कृतिक केन्द्र, म्युजियम र मनोरञ्जन स्थललगायत बन्द गरेलगत्तै मिस नेपाल प्रतियोगिताको गतिविधि र फाइनलको मिति सारिएको छ,’ द हिडन ट्रेजरका अध्यक्ष दिवाकर राजकर्णिकारले भने, ‘आगामी वैशाख १८ पछि मिस नेपाल प्रतियोगिताको प्रतियोगी छनोट र फाइनलको मिति तोक्नेछौं।’
यसपटक मिस नेपालको फाईनल आगामी वैशाख ३ मा राजधानीको अन्नपूर्ण होटलमा आयोजना हुने तय गरिएको थियो।मिस नेपालको प्रतियोगी हुन नेपालका विभिन्न स्थानबाट अडिशन भइसकेको तर काठमाडौंमा भने अडिशन बाकी रहेको थियो ।
मिस वर्ल्ड , मिस अर्थ लगायत विश्व स्तरीय सौन्दर्य प्रतियोगिताको द्वारको रुपमा हेरिरहेको मिस नेपालका कार्यक्रम स्थगित भएसँगै नेपालका ठूला साना सबै मनोरञ्जनात्मक कार्यक्रमहरुमा पनि अरु क्षेत्रमाजस्तै कोरोनाको प्रभाव परेको देखिएको छ ।