प्रधानमन्त्री ओलीलाई डिस्चार्ज गर्ने तयारी

काठमाडौं- प्रधानमन्त्री केपी शर्मा ओलीको स्वास्थ्यमा सन्तोषजनक सुधार हुदै गएकाले धेरैदिन अस्पताल बसाई नलम्बिने भएको छ।
स्वास्थ्यमा उल्लेख्य सुधार आइरहेकोले अब डिस्चार्ज गर्न धेरैदिन नलाग्ने सकिने चिकित्सकहरुले बताएका हुन् ।
त्रिवि शिक्षण अस्पतालका कार्यकारी निर्देशक डा. प्रेम कृष्ण खड्गाले प्रधानमन्त्रीको स्वास्थ्यमा सकारात्मक सुधार आइरहेकाले आउँदो बिहीबार वा शुक्रबारसम्म डिस्चार्ज गर्न सकिने बताएका छन् ।
‘प्रधानमन्त्रीज्यूको यही क्रममा स्वास्थ्यमा सुधार आए केही दिनपछि डिस्चार्ज गर्न सकिन्छ । अहिले नै यही दिन त नभनौं तर बिहीबार वा शुक्रबारसम्म उहाँ बालुवाटार फर्कन सक्नुहुन्छ’ उनले भने।
निर्देशक खड्गाले मिर्गौला प्रत्यारोपणमा संलग्न डाक्टरहरुको सुझावका आधारमा यसबारेमा छलफल गरेर निष्कर्षमा पुग्ने बताएका छन् ।
प्रधानमन्त्री ओली फागुन १९ गते अस्पताल भर्ना भएका हुन् भने त्यसको दुई दिनपछि अर्थात फागुन २१ गते मिर्गौला प्रत्यारोपण गरिएको थियो ।
१३ वर्ष अगाडी भारतको अपोलो अस्पतालमा प्रधानमन्त्री ओलीले पहिलो पटक मृगौला प्रत्यारोपण गरेका थिए। सो मृगौलाले काम गर्न छाडेपछि दोस्रोपटक मृगौला प्रत्यारोपण गरिएको हो । यससँगै प्रधानमन्त्री ओलीको शरीरमा चारवटा मिर्गौला भएका छन् ।
चिकित्सकहरूका अनुसार प्रत्यारोपित मिर्गौलाले राम्ररी काम गरेपछि उनलाई सन्तुलित आहार दिन थालिएको र नियमित हिँडडुल गराउन थालिएको छ ।
डिस्चार्ज पछि पनि प्रधानमन्त्री ओलीले कम्तिमा २ महिना भने आराम नै गर्नुपर्नेछ।