शंखरापुरको ३३२० औँ स्थापना दिवस भव्य रूपमा मनाइयो

साँखु / हलिं नेवाः गुथि सक्व कचाको आयोजनामा भएको ऐतिहासिक शंखरापुर नगरीको ३३२० औँ जन्म दिवस यही फाल्गुण १४ गते भव्यताका साथ सम्पन्न भएको छ ।
कार्यक्रम अनुसार बुधबार बिहान ९ बजेतिर सक्व कटेजबाट प्रभातफेरी सुरु भई साँखु बजार परिक्रमा पछि सोही स्थान पुगेर सभामा परिणत भएको थियो ।
कार्यक्रमको उद्घाटन गर्दै शंखरापुर नगरपालिकाका मेयर सुवर्ण श्रेष्ठले शंखरापुरको धरोहरका रुपमा रहेको बज्रयोगिनी र शालिनदी, ईन्द्रायणी, सलम्बुदेवी लगायतका धार्मिक क्षेत्रको विकास गरि धार्मिक सर्किट बनाउन सकिने विचार व्यक्त गरे ।
शंखरापुर स्थापना दिवसलाई कुनै एक जातजातिको मात्रै नभई सम्पूर्ण नगरवासीहरुको भएको भन्दै अपनत्व कायम हुनेगरि मनाउनुपर्ने उनले धारणा राखे ।
बौद्ध हिन्दू धर्मको संगम स्थलका रुपमा बज्रयोगिनीलाई लिन सकिने भन्दै संस्कृति बचाउन नगरपालिकाले दायित्व बहन गर्ने भएतापनि सबै विषय आर्थिक क्रियाकलापसँग मात्रै जोडिए संस्कृति परम्पराको जगेर्ना गर्न गाह्रो हुने बताए ।
उनले सभ्य र भव्य कार्यक्रमको लागि आयोजकलाई धन्यवाद दिँदै शंखरापुर नगरपालिकामा कार्यरत राजनैतिक पार्टीहरुलाई यस्ता कार्यक्रमहरुमा समावेश गर्नुपर्छ भने ।
उप मेयर शुक्रलक्ष्मी श्रेष्ठले सम्पदा जोगाउनको लागि नगरपालिकाले विभिन्न क्षेत्रमा काम गर्दै आएको बताए ।
कार्यक्रममा उपत्यका सडक विस्तार पीडित संघर्ष समितिका अध्यक्ष सुमन सायमीले समुदायको उन्नतिकोलागि काम गर्नुपर्ने बताउँदै समुदायको अधिकारको लागि प्रतिवद्ध भएर लड्नुपर्ने बताए । उहाँले ३३२० वर्ष अगाडि नै यस्तो राम्रो स्मार्ट सिटी बनिसकेको ठाउँमा अहिले स्याटेलाईट सहर बनाउने नाममा स्थानीयलाई बेवास्ता गर्दै बन्न लागेका विकास निर्माणले स्थानीयको हक अधिकारको ग्यारेन्टी नगर्ने र उनीहरुको सम्पत्तिको अधिकार समेत हनन हुन गएको हुँदा सचेत रहन समेत आग्रह गरे । उनले अबका दिनमा स्थानीय जनप्रतिनिधिहरुको काम कारवाहीविरुद्ध समेत आवाज उठाउन आवश्यक रहेको विचार व्यक्त गरे ।
कार्यक्रममा वडा अध्यक्षहरु विष्णुप्रसाद श्रेष्ठ र राधाकृष्ण श्रेष्ठले यो हलिं नेवाः गुथिको कार्यक्रमहरुमा आफूहरुको निरन्तर साथ सहयोग रहने बताउँदै नगरपालिकाले यस कार्यक्रमलाई आवश्यक सहयोग गरेको विचार व्यक्त गरे ।
कार्यक्रममा ईतिहासविद् प्रकाशमान सक्वले शंखरापुर नगरको इतिहास’ व्याख्या गर्नुभएको थियो । उहाँले जसरी शंखरापुर नगरी ३३२० वर्ष अगाडि स्थापना भएको थियो । सोही समय अथवा सो समयभन्दा अगाडि पछाडि स्थापना भएका अन्य गाउँ सहरहरु पनि अध्ययन हुनुपर्ने विचार व्यक्त गरेका थिए ।
सहयोगी मिडिया :लावन्य सन्देश