डा. बालगोपाल “झीगु सको देय” सफूया लन्डनय् उलेज्या (भिडियो लिसें)

लन्डन / डा. बाल गोपाल श्रेष्ठया “झीगु सको देय : नेवा समाजया संस्कार, संस्कृति, व धर्मकर्मया मानवशास्त्र” सफूया उलेज्या लन्डनय् जुल ।  वंगु नेपाल संवत ११४० सिल्लागा सप्तमि कुन्हुं पासा पुच गुथि युके व लन्डन विश्व विद्यालयया दक्षिण एशिया इनस्टिच्युटया मंका गोसालय लन्डन विश्व विद्यालय जूगु न्हापांगु युरोपव्यापि नेवा: सस्कृति व सम्पदा सम्मेलनया दथुइ डा. बाल गोपाल श्रेष्ठया ‘झीगु सको देय : नेवा समाजया संस्कार, संस्कृति, व धर्मकर्मया मानवशास्त्र” सफूया उलेज्या जूगु दु । पासा पुच गुथि युकेया नायो संयुक्त श्रेष्ठ भाजुं सफूया परिचय बिया दिगु उगु ज्याझोलय अक्सफोर्ड विश्वविद्यालयया प्राध्यापक डा. डाभिड गेल्नर व लन्डन विश्र्वविद्यालयया प्राध्यापक डा. माइकल हट भाजुपिसं सफूया मंका उलेज्या यानादिगु ख । थुगु सफू अंग्रेजी पिदंबले अक्सफोर्ड विश्र्वविद्यालय जूगु ज्याझोलय थपिसं हे न्हापां उलेज्या यानागु खं लुमंका दिसें प्राध्यापक डाभिड गेल्नर भाजुं नेपालभाषाय पिदंगु सफू नं हाकनं थपिसं उलेज्या यायेखंगुलिइ लसता पोंकादिल । सको देया विस्तृत इतिहास लिसें मानवशास्त्रीय अध्ययन कघानाचोंगु थुगु सफुतिइ नेवा समाजया संस्कार, संस्कृति, गुथि गाना, नखचखया दुग्यंकं विश्लेषण दुथ्यानाचोंगु खं धयादिल वयकलं धयादिल । थुगु सफू नेपालभाषाय हिला नेवा बोमितय नितिं सहज याना ब्यूगु तसकं लसताया खं ख धयादिसें वयकलं अनुवादक सिल्भिया राजोपाध्याय नापं पिथनेत गुहालियापिं सकलें सुभायया पात्र ख धका वयकलं धयादिल । अथेहे प्राध्यापक माइकल हट भाजुं अंग्रेजीं नेपालभाषाय भायहिला पिदंगु थुगु सफूया ब्यागलं महत्व दु धयादिसें चोसामि व अनुवादकपिंत भिंतुना देछानादिगु ख ।

शंखरापुर नगरपालिकाया आर्थिक ग्वाहालिं भाषा साहित्य मुंज्या खल सक्वं पिदंगु उगु सफू अंग्रेजीं ‘द सेक्रेड टाउन अफ सांखु’ नामं पिदंगु खसा मयजु सिल्भिया राजोपाध्यायं नेपालभाषाय अनुवाद यानादीगु अले भाजु विमल ताम्राकारं सम्पादन यानादीगु ख ।
उलेज्याया भिदियो स्वयादिसंं –