मोति पत्रकारिता सिरपा नरेशवीर शाक्ययात

सुगत रत्न सिन्दुराकार
यल /  माघ १८ गते शनिवाः नेवाः प्रेस दबूया ग्वसालय् समाजसेवी मोतीलाल शिल्पकारं स्थापना यानादीगु मोती पत्रकारिता सिरपापाखें थुगु दँय् नरेशवीर शाक्य सम्मानीत जुयादीगु दु । भाजु शाक्यपाखें पत्रकारिताया ख्यलय् ताःहाकःगु योगदान याना वयाच्वनादीगुया कदर स्वरुप थुकथं हनेगु ज्या जूगु खः । वय्कःयात हनापौया लिसें झिद्धः तका दां  लःल्हाःगु खः । थुकथं हे स्वनिगःपाखें नेवाः ख्यलय् योगदान यानावयाच्वनादीपिं स्वम्ह व्यक्तित्वपिन्त हनेगु ज्या नं  याःगु ख:।         उगु ज्याझ्वलय् मूपाहाँ शताब्दी पुरुष सत्यमोहन जोशीयात १०० दँ दुगु लसताय् हनाबना नं संस्थापाखें याय्गु ज्या याःगु खः । दँय्दसँ हे नेवाः प्रेस दबूपाखें नेपालभाषा व संस्कृतिया ख्यलय् न्ह्यचिला: योगदान याना वयाच्वंपिं व्यत्तित्वपिन्त हनेगु याना वयाच्वंगु खः । थुकथं हनेगु झ्वलय्  नेसं ११४० स नेपालभाषा ख्यलय् ताःई निसें भाषासेवा याना वयाच्वनादीपिं  भाषासेवी, साहित्यकार ख्वपपाखें तिलक प्रकाश कायस्थ, यलपाखें जगमोहन वामि, यलपाखें अपर्णा प्रधानपिन्त हनावनातसें दोसल्लां  न्ययका:  हंगु खः ।
जनताया नितिं योगदान याना च्वंपिंन्त हनावना तयाः वय्कःपिनिगु संघर्षयात सम्मान यायमाःगु वाःचाय्का हे दबूपाखें थुकथं हना वना तया वयाच्वंगु खः । दबूया मञ्जु बज्राचार्यंं न्ह्याकादीगु थुगु ज्याझ्वः दबूया नायः नरेन्द्र श्रेष्ठया नायःसुइ जूगु खःसा लसकुस न्वचु ऋषि प्रसाद श्रेष्ठं बियादीगु खः । उगु ज्याझ्वलय् मूपाहां सत्यमोहन जोशी नं  बिचाः तयादीगु खः ।
नेवा: संचार दबूया ज्याझ्व:या भिडियो :