लुम्बिनीमा नेपाल थेरवाद बौद्ध संग्रहालयको उद्घाटन, नेपालमा थेरवाद अध्ययन गर्नेहरूको निम्ति उपयुक्त थलो हुन सक्ने दावी !

लुम्बिनी / नेपाल थेरवाद बौद्ध संग्रहालयको एक कार्यक्रमकाबिच लुम्बिनीमा उद्घाटन गरियो ।
शनिबार १२गते शनिबारका दिन  बौद्ध महिला संघ नेपालको सक्रियतामा लुम्बिनीको धर्मोदय सभा स्वयम्भु चैत्य महाविहारमा स्थापना भएको थेरवाद बौद्ध संग्रहालयको उद्घाटन प्रदेश नं ५ का मुख्यमन्त्री शंकर पोखरेलले गर्नुभयो । संग्रहालयको ढोकामा रहेको रिवन काटेर उद्घाटन गरेपछि उहाँले संग्रहालयको अवलोकन गर्नुभएको थियो । संग्रहालयका व्यवस्थापक कर्ण महर्जनले अवलोकनका क्रममा संग्रहालयमा रहेका विविध सामग्रीको बारेमा जानकारी गराउनु भएको  थियो ।
यसभन्दा अगाडि महिला बौद्ध संघ नेपालका अध्यक्ष सुजाता मानन्धरको सभापतित्वमा एक कार्यक्रम आयोजना गरिएको थियो । मुख्यमन्त्री शंकर पोखरेलको प्रमुख आतिथ्यमा भएको उक्त कार्यक्रममा अखिल नेपाल भिक्षु संघका अध्यक्ष भिक्षु मैत्री महास्थविर , लुम्बिनी विकास कोषका उपाध्यक्ष मेत्तेय भन्ते बिशेष अतिथिका रुपमा आउनु भएको थियो । सांसद फखरुद्धिन खान, सिद्धार्थनगर नगरपालिकाका मेयर , धर्म्मोदय सभाका वरिष्ठ उपाध्यक्ष लक्ष्मीदास मानन्धर , महासचिव सागरमान वज्राचार्य , लुम्बिनी धर्मोदय सभा केेेन्द्रिय समितिका पद्मज्योती, भिक्षुणी डा. अनोजा गुरुमां , लुम्बिनी धर्मोदय सभा स्वयम्भू महाचैत्य विहार निर्माण समन्वयका सदस्य द्रव्यमान तुलाधर नेपाल थेरवाद म्युजियमका सुत्रधार निर्माण समितिका संयोजक डा. केशरी लक्ष्मी मानन्धर  लगायतका व्यक्तिहरु अतिथिका रुपमा आउनुभएको थियो ।
कार्यक्रममा बोल्दै मुख्य मन्त्री शंकर पोखरेलले बौद्ध संघहरुले बौद्ध धर्म मान्नेहरुलाई दुई कार्य लुम्बिनीमा गर्न प्रेरित गर्न सके यहाँको महत्त्व अझ बढ्ने बताए । जन्म संस्कारका कुनै कार्य र मृत्युुपछिका कुनै कार्य लुम्बिनीमा गर्न प्रेरित गर्न सके धेरै बुद्धमार्गीहरु लुम्बिनी आउने उहाँले बताउनुभयो ।
लुम्बिनी बौद्ध विश्व विद्यालयका उपकुलपति हृदयरत्न वज्राचार्यले विश्व विद्यालयले म्युजिमोलोजीमा मास्टर्स अध्यापन सुरु गर्न लागेको बताउँदै देवदहमा बुद्धकालिन बाताबरण बनाउन विशेष गरेर वातावरण सम्बन्धि अध्यापन गराउन लागेको पनि बताउनु भयो ।
लुम्बिनी विकास कोषका उपाध्यक्ष मेत्तेय भन्तेले लुम्बिनीमा भइरहेको गतिविधिको चर्चा गर्नुहुंँदै नेपाल थेरवाद संग्रहालय एक महत्वपूर्ण स्थल बन्ने विचार राख्नुभएको थियो ।
कार्यक्रममा मन्तव्य राख्नुहुँदै लुम्बिनी धर्मोदय सभा केन्द्रिय समितिका पद्मज्योतिले लुम्बिनीमा प्राथमिक  स्वास्थ सेवा दिने कार्यदेखि यहाँ बुद्ध जयन्तीको मनाउने चलन धर्मोदय सभाले सुरु गरेको स्मरण गर्नुभयो । उहाँले  यस म्युजियमको स्थापना एक महत्वपूर्ण कार्य भएको उल्लेख गर्नुभयो ।
कार्यक्रममा संग्रहालय निर्माणमा सहयोग पुर्‍याउनेलाई सम्मान गरिएको थियो भने संग्रहालयविद जलकृष्ण श्रेष्ठ र व्यवस्थापक कर्ण महर्जनलाई विशेष कदर पत्र प्रदान गरिएको थियो ।
कार्यक्रममा स्वास्थका कारण उपस्थित हुन नसक्नु भएका संघनायक ज्ञानपूर्णिक महास्थविरको सुभाशिष पत्र भिक्षु बोधिज्ञान महास्थविरले पढेर सुनाउनुभएको थियो ।
कार्यक्रममा उपस्थित सबै क्षेत्रका महानुभावप्रति महिला बौद्ध संघ नेपालका मीराज्योतिले धन्यवाद ज्ञापन गर्नुभएको थियो । सभापति सुजाता मानन्धरले बौद्ध महिला संघका कार्य योजना र नेपाल थेरवाद संग्रहालय स्थापनको बारे कुरा राख्दै सभा विसर्जन गर्नुभएको थियो ।
प्रमुख अतिथिले पानसमा बत्ती बालेर गर्नुभएको औपचारिक कार्यक्रममा भिक्षु मैत्री महास्थविरले पंचशील प्रदान थियो ।
बौद्ध महिला संघ नेपाल बिसं २०३८ सालमा स्थापना भएको थियो । बुद्ध शिक्षा देशका कुनाकाप्चासम्म फैलाउने कार्यमा यस संस्थाले योगदान गर्दै आएको छ ।ध्यान शिविर ,बाल शिविर हुँदै २०५० सालदेखि परियत्तिशिक्षामा समेत निरन्तर योगदान गर्दै आएको यस संस्थाको नेपाल थेरवाद बौद्ध म्युजियम स्थापना एक कोशे ढुंगाको रुपमा हेरिएको छ ।
लुम्बिनीमा स्थापित यस नेपाल थेरवाद वौद्ध संग्रहालयका परिकल्पनाकार संग्रहालयविद जलकृष्ण श्रेष्ठको आर्किटेक्चर ,भिजन अनुसार नैं तयार भएको जानकारी संघले दिएको छ ।  नेपालमा थेरवाद बुद्ध धर्म अध्ययन गर्नेहरुका निम्ति यो उपयुुक्त  स्थल हुन सक्ने संग्रहालय व्यवस्थापनले जनाएको छ ।