लुम्बिनी बिकास कोषको सदस्य सचिबमा ज्ञानिन राई नियुक्त !

भैरहवा / लामो समयसम्म रिक्त रहेको लुम्बिनी विकास कोषको सदस्य सचिवमा ज्ञानिन राई नियुक्त भएका छन् ।
कोषमा सदस्य सचिव नहुँदा कोषकै योजना प्रमुख इन्जिनियर सरोज भट्टराईले निमित्त सदस्य सचिवका रुपमा काम गर्दै आएका थिए ।
माघ ७ गते बसेको पर्यटन मन्त्रालयको मन्त्रीस्तरीय बैठकले कोषका वरिष्ठ कर्मचारीलाई उक्त पदमा नियुक्त गर्ने निर्णय गरेसँगै राई सदस्य सचिवमा नियुक्त भएका हुन् । राई लुम्बिनी विकास कोषको काठमाडौं सम्पर्क कार्यालयका प्रमुख साथै वरिष्ठ अधिकृत हुन्।
२०७४ साल मंसिर महिनामा तत्कालीन सदस्य सचिव अजितमान तामाङको पाँचवर्षे पदावधि समाप्त भएपछि खुल्ला प्रतिष्पर्धाबाट सदस्य सचिव चयनका लागि प्रक्रिया सुरु भएको थियो । तर सरकारले पाल्पा जिल्लाका तत्कालीन प्रमुख जिल्ला अधिकारी बिष्णु प्रसाद ढकाललाई सोझै सदस्य सचिव नियुक्त दिएपछि विवाद भएको थियो । खुल्ला प्रतिष्पर्धाका लागि आवेदन दिएकाहरुले उजुरी गरेपछि ढकालको नियुक्ती विवादित भएको थियो । पछि सरकार आफैले उनलाई हटाएको थियो ।
राई लुम्बिनी र बुद्धिजम समेत बुझेको साथै अन्तर्राष्ट्रिय संघ संस्थाहरुसँग समन्वयकारी भूमिका राम्ररी निर्वाह गर्न सक्ने व्यक्ति भनी दाबी गरिएका छन् ।
जिम्मेवारी आएसँगै आफ्नो जिम्मेवारी राम्रोसँग पुरा गर्ने र लुम्बिनीको समस्याका बारेमा आफु जानकार रहेको बताउँदै छिटो भन्दा छिटो लुम्बिनीमा निर्माणाधीन बाँकी कामहरु साथै गुरुयोजनालाई सम्पन्न गर्न प्राथमिकता दिने उनले बताए ।
यसरी कर्मचारीलाई नैं सिधै सचिब नियुक्त गरेको संभवत पहिलोपटक हो । यो नियुक्तिलाई विद्यमान कानूनले के भन्छ भन्नेबारे केही दिनमा स्पष्ट हुनेछ ।