संकोच ( बाखंचा)

  मथुरा सायमि
भुख्यलय् जि । छेय् लिहाॅ वयेमागु । लिक्कसं भगवान पाउ । अन दुवातय् सवारीसाधन दइ । न्ह्यागुलीसां च्वना वने । दुवातय् खालिखालिगु ट्याक्सित गाहा पियाच्वंपिं दु । ट्याक्सि ड्राइभरतयलिसे धासा खॅ हे ल्हाये मास्ते मवो । मिटर स्यं धाइ । लालाथे भाः तइ ।दोब्बर तेब्बर । थम्हं धयाथे दैमखु । अज्ज इमि हे सः झन तस्सः जुयाच्वनी । मज्जि हे मगाः मजुइकं जिं ट्याक्सि गयेगु मयाना ।
माइक्रो व टेम्पुत उखे मदुगु जुयाच्वन । अथेला अनं खत्वाचा दश मिनेटति वनेवं बिज्यासः द्योयाथाय् थ्यनी । अन टेम्पु स्टायण्ड दु । छत्वाचा न्यासे हे वनेला । लॅय् दिप्पा हे मकासे धैथे मोटर साईकलत वयाच्वंगु दु , वनाच्वंगु दु । खालिगु छगलय् लिफ्ट हे कया बिज्यासः द्योयाथाय् तक्क वने ला। अनं टेम्पुइ च्वने धुनकि छेय् क्वये हे थ्यन । मोटर साइकलपिंके लिफ्ट हे फ्वना वनेगु मती याना ।
याकःचा याकःचा वयाच्वंपिंके लिफ्ट फ्वने थे ल्हाः ब्वयेका। गुलिसिनं थयक स्वयाः ब्वाइ । गुलिसिनं मखंछु याना हुत्तय् जुइ । वास्ताइस्त हे मतः । का मयल । न्यासे हे वने। भचाभचा ला जुइनं माः धयातःगु डाक्टरं । मजुलकि झं वने हे मफयावनी । न्यासे हे बुलुहुॅ वनेगु क्वःछिना । थुथाय् हे लाक्क छम्ह भचा बिस्तारं वयाच्वंगु खना । जिं ल्हाः ब्वयेका । व जिथाय् लिक्क वल ।
स्कूटरय् वयाच्वंम्ह गगल्सं बापाः ख्वाः त्वपुयावःम्ह व ला मिसाम्ह जुयाच्वन । ल्यासेचाम्ह । मिसाम्ह जुयाः जि भचा अकमकय् जुल । छु धाये , गुगु धाये जुयाः उजुंसुजुं जिगु म्हुतुप्वाः हे मचालाच्वन ।
उलिया दुने वं हे नवानाहल ,” कां सम्म जानुपर्ने बाजे ? बस्नुस् ”
ख नं छय् हे धायल्वःम्ह मिसाचा खः व । छकः क्वथीक स्वया । जिगु म्हुतुइ थुकथं खॅ वल , ” भैगो नानी , तिं सम्म मात्र हो। म हिडेरै जान्छु । ”
वं हुॅइत स्कूटर ब्वाकल ।छकलं हुॅथ्यन । दनाच्वनाम्ह जि वाताहाॅ !!!!!