साग फुटबल नेपालले जित्यो, स्वर्णको संख्या ५१ ; स्मरणीय रहने छ १३ औं सागको समापन

                                                     प्रशिक्षक बाल गोपाल महर्जन

काठमाडौं/दक्षिण एसियाली खेलकुद (साग) फुटबल फाइनलमा नेपालले जीत हासिल गरेको छ ।
मंगलबार दशरथ रंगशालामा भएको भुटानविरूद्धको खेलमा नेपालले २–१ को जित निकाल्दै स्वर्ण जितेको हो। नेपालका लागि खेलको १७ ‍औं मिनेटमा अभिषेक रिजालले सिक्सयार्ड बक्सभित्र मौका पाएपछि दाहिने खुट्टाले गोल हानेका थिए।
खेलको ३७ औं मिनेटमा भुटानी कप्तान चेन्चो ग्याल्सेनले गोल फर्काएर बराबरीमा ल्याए।

खेलको ५४ औं मिनेटमा सुनिल बलले हेडिङबाट गोल थपे। सुनिलको गोल नै खेलका लागि अन्तिम गोल रह्यो।
यसअघि  नेपालले भुटानलाई ४-० गोलले पराजित गरेको थियो । भुटानले जारी सागमा बंगलादेशलाई १–० ले, माल्दिभ्सलाई २–१ र श्रीलंकालाई ३–१ ले हराएर फाइनलमा आइपुगेको हो ।
नेपालले सन १९८४ को पहिलो साफ गेममा फूट्बलमा स्वर्ण  जितेको थियो ,त्यसैगरी सन् १९९३ मा  साग फुटबलमा स्वर्ण पदक जितेको थियो । त्यसबेलाको नेपाली टीममा अहिलेका नेपाली राष्टिृय टोलिका प्रशिक्षक बाल गोपाल महर्जन खेलाडीका रुपमा खेलेका थिए । प्रशिक्षक महर्जनलाई भाग्यशाली भन्नुपर्छ । उनले खेलाडी तथा प्रशिक्षकका रुपमा साग फूटबलमा नेपालालई स्वर्ण दिलाउन सफल भए।

सन् १९९९ मा आठौं संस्करणमा नेपाल फाइनल पुगे पनि बंगलादेशसंग १-० ले पराजित भएको थियो ।त्यतिबेलाको नेपाली टीम उत्कृष्ट फर्ममा थियो तर आफ्नै होम ग्राउण्डमा नेपालाले भोगेको नमज्जाको पराजयलाई यसपालिको विजयको स्वर्णले मलम लगाउने कार्य गरेको छ । यसअघि भारतमा भएको १२औंसागमा पनि नेपालले फुटबलतर्फको स्वर्ण पदक जितेको थियो । अघिल्लो संस्करणमा भारतलाई हराउँदै नेपालले स्वर्ण जितेको थियो ।