लोककवि जक:मिया “न्हयगां जात्रा” मेचा: पिहां वइगु

यें/लोककवि राजभाई जक:मिया “न्हयगां जात्रा” म्येचा: पिहां वइगु जूगु दु ।
येंया दक्षिण भेगय् ला:गु किपू देय् लिसें दक्षिण पश्चिम भेगया न्हयगां जात्राया लसताय् मंसीर १४ गते शनिवाः लोककवि राजभाई जकःमिया च्वसां पिज्वःगु व संगीतकःमि रीता महर्जनं लसय् हनादीगु थीथी सवा:या म्ये दुथ्याःगु म्येचाः ‘न्हयगां जात्रा’ विमोचन जुइगु जूगु दु ।

मन्दः फल्चा अमल्सि खल:या ग्वसालय् जुइगु उगु ज्याझ्वलय् मूपाहाँ कथं जनकवि दुर्गालाल श्रेष्ठ झायादीगु अले वय्कलं हे उगु म्येचाः उलेज्या यानादीगु जानकारी ग्वसाः खलकं ब्यूगु दु ।
किपूया नगरमण्डप श्रीकीर्ति विहारय् ज्याझ्व: जुइ ।
उगु ज्याझ्वलय् ग्वसा:खल: मन्दः फल्चा अमल्सिं  लोककवि राजभाई जकःमि व संगीतकःमि रीता महर्जनयात हनेज्या याइगु ज्याझ्व: नं दुगु खँ धा:गु दु ।
पिदनेयंगु ‘न्हयगां जात्रा’ म्येचालय् जागरण म्ये, सांस्कृतिक म्ये, मचा म्ये व भजन म्ये यानाः मुक्कं १० पु म्ये दुथ्याकात:गु दु ।