साहित्यकार प्रधानया छकलं प्यंगू सफू चिखिफ्यनेज्या

येँ, कछलाथ्व चौथि । नेपालभाषाया साहित्यकार अपर्णा प्रधानया थीथी भाय्या  प्यंगू सफू शनिवाः येँ चिखिफ्यनेज्या जूगु दु ।
साहित्यकार अपर्णा प्रधानया ‘जि भमचा कतांमरि’ मूपाहाँ शताब्दी पुरुष सत्यमोहन जोशी, ‘झीगु साहित्यय् मथुरा साय्’ (नेपालभाषा) नेपालभाषा एकेडेमिया भाइस चान्सलर यज्ञरत्न धाख्वाः, ‘म र मेरो समय’ (खस भाषा) कृष्णलाल प्रधान व ‘Time Of My Life’ (अंग्रेजी भाषा) नेपालसाहित्य मन्दिरया नायः तिलक प्रकाश कायस्थं मंकाः कथं पितब्वज्या यानादीगु खः ।
भाइस चान्सलर धाख्वाःया नायःसुइ हसना लवजुं न्ह्याकादीगु ज्याझ्वलय् बिमल ताम्राकारं लसकुस न्वचू तयादीगु खः ।
पिदंगु सफूत ‘म र मेरो समय’ साहित्यकार ईश्वरी मैया श्रेष्ठ व ‘Time Of My Life’ सिल्भिया राजोपाध्यायं भाय्हिलादीगु खः ।
मूपाहाँ जोशीं नेवाः साहित्ययात अग्रेजी भाषं भाय् हिलाः विश्वव्यापीकरण यायेमाःगु खँय् बःबियादिल ।
ज्याझ्वलय् साहित्यकार समाजसेवी हितकर वीर सिंह कंशाकार, समालोचक पूर्ण काजी ताम्राकार, डा. सुन्दरकृष्ण जोशी, नेपालभाषा उपन्यासकार मथुरा साय्मि लगायतपिसं पिदंगु सफू नापं च्वमि प्रधानया बारय् कुलादिल ।
ज्याझ्वलय् नवासें सत्यमोहन जोशीं नेपालभाषा ख्यलय् थ्व उमेरय् तकं च्वयेगु व सफू हे पिथनेगु ज्याय् सक्रियता क्यनादीम्ह प्रधानया जाँगरयात च्वछासें वय्कःथज्याःपिनिगु लगनशिलतां हे नेपालभाषा साहित्यया विकास जूगु खः नं धयादिल । अथे हे वय्कलं पिकाकः कुतः पिकाकःया तःदँसिनेंया थी थी योगदानया नं सराहना यानादिल ।
बाखं च्वमि हितकरवीर कंसाकारं च्वमि अपर्णाया च्वज्याय् वय्कःया जहान शान्तवीर प्रधानया योगदान दूगु खँ लुमंकादिल ।
उपन्यासकार व बाखं च्वमि मथुरा सायमिं थःगु कृतियात कयाः हे जक समालोचना सफू च्वयादिइगुलिं अपर्णायात सुभाय् बियादिल ।
समालोचक पूर्ण ताम्र्राकारं थौं कन्हय् छगू विधाया दुने मेगु विधा वइगु स्वभाविक जूगुलिं अपर्णाया निबन्ध सफुतिइ बाखंया तत्वत दइगुयात मेकथं मकायेत इनाप यानादिल ।