न्हूदँया लसताय् ख्वपय् थीथी ज्याझ्वः जुइगु

ख्वप – नेपाल संवत ११४० न्हूदँया लसताय् ख्वपय् थीथी संघसंस्थातय्सं थीथी कथंया ज्याझ्वः यायेत्यंगु दु । वइगु कछलाथ्व पारु कार्तिक १२ गते मंगलवाःकुन्हु सुथय् नेपालभाषा साहित्य तःमुँज्यापाखें दँय्दसं थें थुगुसी नं न्हूदँया लसताय् सुजद्यःमरः त्वालं छगू भिंतुना सांस्कृतिक र्‍याली याली पिथनाः नगर परिक्रमा याइगु जूगु दु ।
उगु र्‍याली ख्वप देय् चाःहिलेधुंकाः मास्टर जगतसुन्दर मल्लया प्रतिमास्थल खौमाय् थ्यंकाः माल्यार्पण यासें सभाय् हिली । ज्याझ्वलय् ख्वप नगरपालिकाया प्रमुख सुनिल
प्रजापति नापं थीथी व्यक्तिं न्हूदँ व थीथी समसामयिक विषयय् न्ववानादीगु ज्याझ्वः दु ।
अथेहे विविध भाषा साहित्य समाजया ग्वसालय् उकुन्हु हे सुथय् ७ बजे बोडेया ख्वपलाँ त्वालं छगू भिंतुना सांस्कृतिक र्‍याली याली पिदनीगु जूगु दु । उगु ¥याली बाहाखा बजाः, चपाच्व, बालकुमारी जुयाः हाकनं उगु सांस्कृतिक र्‍याली याली विविध भाषा सम्मेलनस्थल तुलंननिइ थ्यंकाः सभाय् हिली ।
वयां लिपा न्हिनसिया ११ बजेनिसें नीछक्वःगु विविध भाषा साहित्य सम्मेलन ज्याझ्वः जुइ । सम्मेलनय् मूपाहांकथं नेमकिपाया अध्यक्ष नारायणमान बिजुक्छेँ रोहितयात ब्वनातःगु दु ।
कछलाथ्व पारुकुन्हु हे राष्ट्रिय विभूति शंखधर साख्वाः प्रतिष्ठानया ग्वसालय् सुथय् ८ बजे शंखधर चोकय् शंखधरया झ्वाताय् मल्र्यापण यायेगु ज्याझ्वः तयातःगु दु । उगु ज्याझ्वलय् मूपाहां प्रधानमन्त्री केपी शर्मा ओलीं राष्ट्रिय विभूति शंखधर साख्वाःया झ्वाताँय् माल्यार्पण याइगु ज्याझ्वः तयातःगु दु ।
courtesy: nepalbhasatimes