जनताको शक्ति पद्मरत्नलाई स्मरण गरियो !

काठमाडौं /नेपालका सुपुत्र पद्मरत्न तुलाधरको वार्षिक पूण्यतिथिमा आज उहाँको स्मरण गर्दै पद्मरत्न लुमन्ति गुथिले काठमाडौंको न्युरोडस्थित सासा बैंक्वेटमा एक कार्यक्रम आयोजना गर्‍यो ।
नेपालको इतिहासमा राजनीति परिवर्तन र मानव अधिकार क्षेत्रमा अनि नेवा: आन्दोलनमा आफ्नो जीवन समर्पण गर्नुभएका तुलाधरको स्मरण सभामा विभिन्न क्षेत्रका व्यक्तित्वहरुको उपस्थिति रहेको ।
बि सं २०४३ सालको राष्ट्रिय पंचायतको चुनावमा जनपक्षीय उम्मेदवारको रूपमा चुनाव लडेर अत्यधिक बहुमतले चुनाब जितेका उनले निर्दलीय राष्ट्रिय पंचायतको बैठकमा बहुदलीय प्रजातान्त्रको माग गरेका थिए जुन त्यस सभामा कसैले बोल्ने हिम्मत पनि गरेका थिएनन् । पद्मरत्न तुलाधरको त्यस बेलाको चुनाव चिन्ह सूर्य थियो । उहाँको लोकप्रियताका कारण उपत्यकामा सूर्यको लहर आएको देखेर तत्कालीन नेकपा एमालेले २०४६ को लोकतान्त्रिक आन्दोलनको सफलतापछि भएको चुनावमा यहि चिन्ह लिएर लडेको र सफलता पनि हासिल गरेको थियो ।

२०४७ सालको आमचुनावको विजय र्‍यालीमा सगुन ग्रहण गर्दै जनताका शक्ति पद्मरत्न तुलाधर – फोटो : महर्जन रत्न

पद्मरत्न जीवन भरी नैं भाषा आन्दोलन , नेपाल संवत् आन्दोलन , आदिवासी जनजाति आन्दोलन र मानव अधिकारको लडाइँमा लागि रहेका राजनेता हुन् । उनी नेपाल भाषाका प्रसिद्ध साहित्य साधक पनि हुन् । उनका ब्यंग्यात्मक एकांकी नाटकहरु निकै प्रसिद्ध छन् । उनी छद्म नाम प्रयोग गरेर लेख्ने एक अग्रज पत्रकार पनि थिए।
बार्षिक पूण्यतिथिको स्मृति सभामा उहाँको साहित्यक क्षेत्रको बारे बोल्नुहुँदै साहित्यकार भूषण प्रसाद श्रेष्ठले उहाँसँग बिताउनु भएका पलहरु सम्झनु भयो । उहाँ सँगै संयुक्त रुपमा लेखन कार्य गरेको उपन्यास सम्झनुहुँदै उहाँले उक्त अपूर्ण उपन्यास बारे पनि बोल्नु भयो ।” रुन्चे नेता भनेर भनियो उहाँलाई राजनीतिमा आएपछि । तर भावुक व्यक्ति उहाँ त्यसभन्दा पहिला पनि रुनुहुन्थ्यो बोल्ने क्रममा । पोखराको मांभाय् पुच:ले पृथ्वीनारायण नारायण क्याम्पसमा आयोजना गरेको एक कार्यक्रममा मातृभाषाको अवस्था बारे बोल्दाबोल्दै भावुक भएर उहाँ रुनुभएको थियो । उहाँ भाषण गर्ने क्रममा रुनुभएको यहि पहिलोचोटि थियो। यो ने.सं. १०९९ को कुरा हो । अहिले नेसं११४० लाग्दैछ ।पछि उहाँले रुने बानी मेरो कमजोरी हो भनेर भन्नुभो ! ”
पद्मरत्न लुमन्ती दबूका अध्यक्ष पूवमन्त्री डा. केशव मान शाक्यले “उहाँको योगदानलाई स्मरण गर्न र उहाँले देखाउनु भएको बाटोमा हिंड्न प्रेरित गर्ने उद्देश्यलेलुमन्ती दबू संस्था स्थापना गरेका हौं” भन्नुभयो ।
कार्यक्रममा सांसद कृष्ण गोपाल श्रेष्ठ , मानव अधिकार अभियन्ता श्याम श्रेष्ठ , नरेश वीर शाक्य लगायत वक्ताले पनि आफ्नो मन्तब्य राख्नु भएको थियो । बोल्ने क्रममा अधिकारकर्मी अभियन्ता श्याम श्रेष्ठले माओवादी सरकार बार्तामा ल्याउने कार्य गर्नमा र माओवादीलाई शान्तिप्रक्रियामा ल्याउन गरेको उहाँको महत्त्वपूर्ण भूमिका सम्झनु भयो भने सांसद श्रेष्ठले उहाँको पहिलो चुनावी मोर्चादेखिको वृतान्त सुनाउनु भएको थियो ।
मंचको श्रद्धाञ्जली कार्यक्रम अगाडि पद्मरत्न तुलाधर बारे एक डकुमेन्ट्री प्रदर्शन गरिएको थियो ।
श्रद्धाञ्जली सभामा परिवारका तर्फबाट उहाँकी सुपुत्री सुम्निमा तुलाधरले आफ्ना पिताको नाममा लुमन्ती दबू स्थापना गरि उहाँलाई सम्झने कार्य गरेकोमा धन्यवाद ज्ञापनप गर्दै आफ्ना पिता पद्मरत्न तुलाधरले अझै आन्दोलन सकेको छैन आदिवासी जनजाति आन्दोलन , मातृभाषा आन्दोलन लगायत मौलिक अधिकारका धेरै आन्दोलन अझै अधुरो रहेको र यसका निम्ति आन्दोलन जारी नैं राख्नुपर्ने कुरामा जोड दिंदै आएको कुरा सम्झना गर्नुभएको थियो ।
श्रद्धाञ्जली सभाका केही तस्वीरहरु