धस्वाइगु जुल मंकाः खलःया दबूछेँ

येँ, कौलागा त्रयोदशी । प्यंगू दशक न्ह्यः हे नेवाःतय्सं छगू म्हगस खंगु खः — थःगु जाति, भाषा व संस्कृतिप्रति चिउता दयावःलिसे नेवाःतयसं थःगु हे कथं या मुँज्या यायेत व थःगु मौलिक प्याखं परम्पराकथं प्याखं क्यनेत दबू छगू दयेकेगु । लिबात तर साकार मजुसे मगात । थौं नेपालभाषा मंकाः खलःया थःगु जग्गाय् दबू छेँ दनेत जग तयेगु ज्या पुवन ।

जग तयेगु ज्या मंकाः खलःया नामय् दूगु येँया विजयेश्वरी ससुख्वालय् येँ महानगरपालिकाया मेयर विद्या सुन्दर शाक्य,
उपमेयर हरिप्रभा खड्गी श्रेष्ठ, नेपालभाषा मंकाः खलःया अध्यक्ष दुर्गालाल श्रेष्ठ
न्हूदँ समाराेह समितिया अध्यक्ष रमेश महर्जन व मदुम्ह पद्मरत्न तुलाधरया जहान निलशोभा तुलाधरपिनि ल्हातिं
मंकाः कथं जुल ।

ज्याझ्वलय् नवासें अध्यक्ष दुर्गालाल श्रेष्ठं धयादिल — जिं ला खनेधुन । छिकपिं भासन यानाच्वनादिल, जिं ला थन हे च्वनाः थन झीगु दबूछेँ धस्वानाच्वंगु
खना । थ्व प्र्त्येक नेवाःया म्हगस जुइमाः ।

मेयर विद्या सुन्दर शाक्यं येँय् नेवाःतय्गु हक व अस्तित्व कायम यायेत नं नेवाःतय्सं थःगु हे दबू छेँ दयेकेमाःगु खँ ल्ह्वँसें डिजाइन इत्यादिया ज्या क्वचाल
धायेवं बचं बियाथें न्यागू करोड ध्यबा महानगरपालिकापाखें वइगु खँय् विश्वस्त यानादिल । लिसें सकसितं थःगु कार्यकाल सिधये न्ह्यः हे निदँ दुने हे ज्या
क्वचायेकेत इनाप यानादिल ।

न्वकू मल्ल के सुन्दरं गुकथं मंकाःखलःया नीस्वनेधुनेवं दबूछेँया निंतिं चन्दा म्हयेत त्यःसिं त्यः फ्वं वनागु अले महाकवि चित्तधर हृदयं भिंतुना रयालिइ
नेवाःतय्गु सहभागिता खनाः उत्साहित जुयाः थःगु जग्गा पासयानाबिउगु खँ लुमंका दिल ।

छ्यान्जे राजा शाक्यं तःदँ तक निष्कृय जुयाच्वंगु मंकाः खलःयात पुनर्जीवन बिइत थःपिं वयागु अले याकनं हे तःमुँज्या यानाः ज्यासनीपिन्त
थ्व जिम्मेवारी लःल्हायेगु योजना नं कनादिल ।
courtesy : jheegu.com