पोखरामा स्वन्ति नख: तिहार बजार लाग्ने ! लक्ष्मी पूजा म्हपूजा र किजापूजा (भाइटिका)को लागि आवश्यक सामाग्री एकै ठाउँमा उपलब्ध गराइने

पोखरा /नेवार समुदायको महत्वपूर्ण चाड स्वन्तिनख:(तिहार) तथा नेपालको राष्ट्रिय संवत् नेपाल सम्वतको नयाँ वर्ष दैलोमै आइसकेको बेला स्वन्ति नख:(तिहार पर्व)को निम्ति आवश्यक सामाग्रीहरु एकै ठाउँमा किनमेल गर्न सक्नेगरी नेवा: खल: कास्कीले पोखरामा स्वन्तिनख: तिहार बजार कार्यक्रम आयोजना गर्ने भएको छ । यो बजार नेवा: संचालन संयोजन गर्ने जिम्मेवारी खल:को भातृ संगठन मिसा पुच: कास्कीले पाएको छ ।

मिसा: पुच:का अध्यक्ष शान्ति श्रेष्ठ उदासले यस बजार बारे जानकारी दिनुहुँदै भन्नुभयो स्वन्तिनख: तिहारको लागि आवश्यक सम्पूर्ण सामाग्रीहरु यस बजारमा पाइनेछन् ।आउँदो शनिबार (कार्तिक ९ गते ) यहाँको नयाँ बजारस्थित बिबेक पेट्रोल पम्पको अगाडि यो बजार लाग्दैछ । उक्त बजारमा सबैलाई स्वागत गर्न चाहेको कुरा बताउनु भयो ।
स्वन्तिनख: तिहार बजारमा लक्ष्मीपूजा, म्हपुजा, किजापुजा(भाइटिका) को लागि आवस्यक सम्पूर्ण सरसामानहरु इता: जजंका , रोटीहरु , बयर, कटुस, ओखर , बदाम, टोपी , पछ्यौरा,आखें, हाँसको अन्डा , बिमिरो, कालो भटमास , रेखी राख्ने पोताय, मन्दप बनाउने रङहरु, ताय( लावा )नेवार गहनाहरु, लाखामरि , ग्वय् स्वां , फुलमाला,फलफुल लगायत अन्य सबै कुरा एकै ठाउमा पाइने कुरा पनि जानकारी गराइएको छ |

यसैबीच सरकारले नेसं ११४० कछलाथ्व २ तदनुसार कार्तिक १३ गते किजापूजाको दिन सरकारले प्रकाशित क्यालेन्डरमा बिदा नभएपनि सो दिन बिदा दिने घोषणा प्रधानमन्त्री केपि ओलिले नेपाल संवत् न्हूदं राष्ट्रिय समारोह समिति सँगको भेट्मा गरिसक्नुभएको छ ।

नेवा: भाषा संस्कृति जगेर्ना गर्ने कार्यमा अग्रणी भूमिका खेल्दै आएको नेवा: खल: कास्कीको यो स्वन्तिनख: तिहार बजारले पनि आफ्नो परम्परागत संस्कृतिलाई निरन्तरता दिने कार्यमा मद्दत गर्नेछ भन्ने उद्देश्यका साथ यस प्रकारको कार्यक्रम ल्याएको जानकारी दिनुहँदै नेवा: खल: कास्कीका अध्यक्ष अशोक पालिखेले हामीले बोल्ने मात्र हैन काम गरेर देखाउनु पर्ने कुरामा जोड दिनुभयो ।

नेवा: खल: कास्कीको यो स्वन्ति नख: तिहार बजार कार्यक्रम सांस्कृतिक दृष्टिकोणले पनि महत्त्वपूर्ण रहेको छ ।