राष्ट्रपति पौडेल व अजरबैजानया राष्ट्रपतिदथुइ खँल्हाबल्हा : थःपिसं यानागु प्रतिवद्धता पूवंकेत विकसित देय्तय्त इनाप

राष्ट्रपति पौडेलं गणतन्त्र अजरबैजानया समकक्षी ईल्हाम अलियेभनाप थौं थन जूगु खँल्हाबल्हाया झ्वलय् उगु इनाप यानादिल ।

“जलवायु ह्यूपाःसम्बन्धी पेरिस सम्झौताय् नेपाःया पूर्ण प्रतिबद्वता दु, विश्वन्यंक तातुना स्वयां न्यादँ न्हयः सन् २०४५ तक नेपालं शून्य कार्वन उत्सर्जनया उपलब्धि काइगु आज्जु तःगुलिं झीपिं फुक्क विकसित देय्तय्त जलवायु ह्यूपाया लिच्वः संबोधन यायेत क्यंगु थःगु प्रतिबद्धतात पूवंकेत इनाप यानाच्वना”, राष्ट्रपति पौडेलया धापू उद्धृत यानाः वय्कःया प्रेस सल्लाहकार किरण पोखरेलं न्ह्यथनादिल ।

राष्ट्रपति पौडेलं नेपालं तसकं म्हो जक कार्बन उत्सर्जन याःसां जलवायु ह्यूपाःया तःधंगु लिच्वः फयाच्वंगु धयादिल । वय्कलं च्वापुगुँइ दूगु च्वापु नायावयाच्वंगु, क्वय् च्वंगु तटीय लागाय् मनूतय्त त्वनेगु लःया स्रोत म्ह्वः जुयाः वनाच्वंगु नापं जलवायु ह्यूपाःपाखें जूगु प्राकृतिक विपद्पाखें दँय्दसं तःधंगु जनधनया क्षति जुयाच्वंगु न्ह्यथसें थुगु दँय् नं बेमौसमी वा वयाः नेपालं देय्न्यंक जनधनया तःधंगु क्षति फयेमाःगु धकाः कनादिल ।

“सरकारं दँय्दसं बजेटया तःधंगु ब्व जलवायुपाखें प्रभावित मनूतय्गु निंतिं खर्च यानाच्वनेमाःगु दु”, राष्ट्रपति पौडेलं धयादिल । गुँ लागाया भू–बनोट नापं भू–परिवेष्ठित अवस्थितिया हुनिं झीपिं दथुइ भौगोलिक समानता जक मखु गुँ लागाया देय्तय्सं फयेमाःगु संरचनागत हाथ्या व लिच्वःत नं बराबर जूगु न्ह्यथनाः वय्कलं धयादिल, “जलवायु ह्यूपाः विश्वया मंकाः विषय खः, गुँ लागाया भू–भाग दूगु झीगु निगुलिं देसं जलवायु ह्यूपाःया बांमलाःगु लिच्वःत फयाच्वनेमाःगु दु, नेपालं गुँ लागाया देय्तय्सं फयाच्वनेमाःगु विषययात कोपलिसेंया मञ्चतपाखेें नं खँ तयावयाच्वंगुलिं थुकी अजरबैजानी सरकारया ऐक्यबद्धताया निंतिं इनाप यानाच्वना ।”

सन् १९९१ य् स्वतन्त्र जुइधुंकाः अजरबैजानं याःगु बृहत् विकास व आर्थिक ह्यूपाःया राष्ट्रपति पौडेलं च्वछाया दिल । वय्कलं राजनीतिक ह्यूपाःलिपा नेपाः आः आर्थिक विकासया लँय् न्ह्याःवनाःच्वंगु व सरकारया प्राथमिकता दिगो आर्थिक विकास जूगु धयादिल ।

“आर्थिक ह्यूपाः व विकासबिना झीसं यानागु राजनीतिक उपलब्धि संस्थागत याये फइमखु”, राष्ट्रपति पौडेलं धयादिल । वय्कलं अजरबैजानया समकक्षी अलियेफया सक्षम नेतृत्वय् जुयाच्वंगु कोप–२९ या पूर्ण सफलताया निंतिं भिंतुना बिसें सम्मेलनं पारित याःगु घोषणापत्रं नेपाल थेंजाःगु तसकं म्ह्वः कार्बन उत्सर्जन याइगु तर जलवायु ह्यूपाःया तःधंगु असर फयेमाःगु देय्या हकया संरक्षण याइगु भलसा प्वंकादिल । वय्कलं नेपालय् कृषि, पर्यटन व जलस्रोतया लागाय् लगानीया बांलाःगु सम्भावना दूगु खँय् नं ध्यानाकर्षण यानादिल ।

थ्व झ्वलय् अजरबैजानया राष्ट्रपति अलियेभं थः अझ नं छदँ कोपया नायः जुइदनीगु व जलवायु ह्यूपाःसम्बन्धी मुद्दाय् लिक्क च्वनाः ज्या यायेगु धयादीगु सल्लाहाकार पोखरेलं न्ह्यथनादिल । राष्ट्रपति अलियेफं नेपालं प्रस्ताव याइगु ख्यलय् लगानी यायेत थःगु देय् सकारात्मक जूगु कनादिल ।

सन् १९९५ य् नेपाः व अजरबैजानदथुइ कूटनीतिक सम्बन्ध नीस्वंगु खः । निगुलिं देय् नं संयुक्त राष्ट्रसङ्घलगायत बहुपक्षीय मञ्चय् दिगो विकास नापं जलवायु ह्यूपाः थेंजाःगु मंकाः च्यूताःया विषयस मंकाःज्या यानावयाच्वंगु दु । राष्ट्रपति पौडेलं कोप–२९ अन्तर्गत उच्चस्तरीय सत्रया ‘विश्व नेतात जलवायु कार्य शिखर सम्मेलन’यात मङ्गलबाः संबोधन यानादीगु खः । सम्मेलनया झ्वलय् नेपालं थःगु एजेण्डाय् विश्वया ध्यानाकर्षण याकेत कात्तिक २८ गते राष्ट्रपति पौडेलया नेतृत्वय् बिस्कंगु उच्चस्तरीय सत्र न्ह्याकूगु खः ।

राष्ट्रपति पौडेलं किर्गिस्तानं ग्वसाःग्वःगु ज्याझ्वःयात संबोधन यानादीगु खः । संयुक्त राष्ट्रसङ्घया महासचिव एन्टोनिओ गुटेरेसं अल्पविकसित देय्तयगु राष्ट्र÷सरकार प्रमुखतलिसे सामूहिक कथं नापलायेगु ज्याझ्वलय् तकं वय्कलं ब्वति कयादीगु खः ।

थ्व हे कात्तिक २६ गतेनिसें न्ह्याःगु सम्मेलन आः वइगु मङ्सिर ७ गतेतक न्ह्याइ । सम्मेलनय् ब्वति कायेत नेपाःया प्रतिनिधिमण्डलया नेतृत्व यानाः राष्ट्रपति पौडेल कतारया दोहा जुयाः सोमवाः गणतन्त्र अजरबैजानया राजधानी बाकु थ्यंकादीगु खः । अजरबैजानया समकक्षीलिसे नाप लानाः राष्ट्रपति पौडेल थःगु देशय् लिहाँ वयेगु झ्वलय् थौं बाकुपाखे कतारया दोहा झाइ । राष्ट्रपति पौडेल शुक्रवाः सुथय् येँय् लिहाँ झाइगु ज्याझ्वः दु ।