मायादेवी ,रामग्राम , तिलौराकोटसहितको बृहत्तर लुम्बिनी योजना , स्थानीयसँग छलफल कार्यक्रम आयोजना

बिन्दु चौहान, सुभाय् पोष्ट सम्वाददाता

लुम्बिनी /बृहत्तर लुम्बिनी क्षेत्रको विकास अवधारणा बारे लुम्बिनीमा  एक छलफल कार्यक्रम आयोजना गरियो ।
लुम्बिनी विकास काेषको आयोजनामा वृहत्तर लुम्बिनी क्षेत्रकाे विकासकाे अवधारणाबारे माघ २१ गते स्थानीय समुदायसँग छलफल गरि उनीहरूकाे राय सुझाव संकलन गरिएकाे हो । तीन वर्गमाइलकाे लुम्बिनी विकास क्षेत्र वरिपरिका ठाउँहरूकाे विकास के कसरी गर्ने भन्ने विषयमा सराेकारवाला सबैकाे उपस्थितिमा व्यापक एवं वृहत्तर छलफल  भएकाे आयोजकले बताएको छ।  यस कार्ययक्रमले यी ठाउँहरूकाे विकासका लागि याेजना बनाउन सहज हुन विश्वास गरिएकाे छ । कार्यक्रममा  संस्कृति, पर्यटन तथा नागरिक उड्डयनमन्त्री श्री याेगेश भट्टराई प्रमुख अतिथिका रूपमा आएका थिए ।कार्यक्रममा बोल्दै मन्त्री भट्टराईले बृहत्तर लुम्बिनीको विकासलाई सरकारले अगाडि बढाउने बताए । लुम्बिनी विश्वमा नेपाललाई चिनाउने अग्रणी सम्पदा रहेको भन्दै उनले यसको विकास सरकारको प्राथमिकतामा रहेको भन्दै उनले बृहत्तर लुम्बिनीको विकास गर्दा बहुसांस्कृतिक पक्षलाई ध्यानमा राखेर काम गर्ने प्रतिवद्धता पनि व्यक्त गरे ।मायादेवी, रामग्राम, तिलौराकोट  समेटेर  बृहत्तर लुम्बिनीका रूपमा विकास गरिने  र यसका निम्ति प्रदेश सरकार, स्थानीय सरकार र सरोकारवाला निकाय सबैसँग छलफल गरिने उनले बताए ।
कोरियाली प्राध्यापक क्वाकले अघि सारेको लुम्बिनी विकासको योजनालाई पनि सरकारले प्राथमिकतामा राखेको र यसलाई पनि कार्यान्वयन गर्नु आवश्यक रहेको देखिन्छ  ।
जापानी आर्कितेक्चर केन्जो टाङ्गेले सन १९७८ मा बनाएको लुम्बिनी गुरुयोजना बाहिर २४ वर्गमाइलको क्षेत्रफलमा पर्ने गरी कोरियन प्राध्यापक क्वाकले शान्ति शहरको गुरुयोजना बनाएका थिए । उनको गुरुयोजनाले लुम्बिनीको पाँच वर्गमाइल क्षेत्रमा शान्ति शहर बनाउने र बाँकी १९ वर्गमाइल क्षेत्रलाई कृषि पर्यटन क्षेत्रको रुपमा विकास गर्ने लक्ष्य राखेको छ । पाँच वर्गमाइल क्षेत्र भित्र लुम्बिनी वरिपरिका गाउँ समेटिनेछन् ।
भगवान गौतम बुद्धको जन्मभूमि विश्वका धार्मिक पर्यटनका लागि आकर्षक स्थल हो । यस वरपर हाल धेरै भौतिक निर्माण हुँदै गरेको छ जुन व्यवस्थित देखिंदैन । यसले भविष्यमा गएर लुम्बिनीको आकर्षक सौर्न्दर्यलाई नराम्ररी प्रभावित गर्न सक्छ । त्यसैले समयमै व्यवस्थित योजना बनाएर लुम्बिनीलाई शान्ति नगर हरियाली क्षेत्र र पवित्र सांस्कृतिक नगरको रूपमा विकास गरेर लैजान सके नेपालको पर्यटन क्षेत्रमा पनि सकारात्मक प्रभाव पार्नेछ ।साथै विश्व बौद्ध जगतको भावना पनि कदर गरेको ठहरिने छ ।